Pse Zulfaj akuzon Ramën për mungesë njohurieje në integrimet evropiane?

PRISHTINË — Kryenegociatori i Kosovës me Bashkimin Evropian, Jeton Zulfaj, i ka përgjigjur ashpër akuzave të kryetarit të Prishtinës, Përparim Rama, i cili kishte deklaruar se Qeveria po e çon Kosovën drejt izolimit ndërkombëtar dhe humbjes së fondeve të BE-së.

Në një intervistë për "Përballje Podcast" në Telegrafi.com, Zulfaj tha se Rama "nuk e di çka po flet", pasi nuk njeh procesin e integrimeve, ligjbërjes apo reformave të Planit të Rritjes. "Mendoj që duhet të merret me bllokadën e Prishtinës, që është e bllokuar gjithandej," shtoi ai.

Zulfaj mohoi akuzat se Qeveria ka bllokuar ndonjë proces. Sipas tij, marrëveshja për instrumentin e Planit të Rritjes iu dërgua Kuvendit në nëntor 2024, por u bllokua atje. "Qeveria nuk po e bllokon atë. Dhe në anën tjetër, nuk i ka bllokuar asnjë prej proceseve," deklaroi ai.

Bllokada në Kuvend, sipas Zulfajt, ka penguar miratimin e ligjeve të nevojshme për përmbushjen e reformave, duke rrezikuar humbjen e mbi 40 milionë eurove nga BE-ja. Ai e drejtoi përgjegjësinë te opozita, e cila, sipas tij, ka penguar kalimin e dy marrëveshjeve për Planin e Rritjes gjatë vitit 2024.

"Opozita e bllokoi gjatë gjithë vitit kalimin e dy marrëveshjeve, në mënyrë që ai të hynte në fuqi dhe reformat të fillonin sa më shpejt," tha Zulfaj. Ai shtoi se nëse Kuvendi do të kishte funksionuar normalisht, ligjet do të kishin kaluar në kohë.

Zulfaj theksoi se humbja e fondeve nuk dëmton vetëm Qeverinë, por Republikën e Kosovës. "Mjetet që humbin nuk janë për mua, as për Qeverinë, janë për Republikën," tha ai. Reformat do të përmbushen sapo të formohen institucionet e reja, por vonesat kanë bërë që Kosova të mos i plotësojë afatet e përcaktuara nga BE-ja.

"Të gjitha këto pesë ligje dhe Strategjia kundër Krimit të Organizuar do të miratohen sapo të formohet Qeveria dhe Kuvendi i ri. Problemi është që nuk i kemi kryer në afatin e duhur," përfundoi Zulfaj.

Burim: Zëri, Telegrafi.com
— Redaksia ZHURMA