Pse rikthehen 'Livadhet e Fasules' në Serbi si dyshim për varrezë masive?

Rreth 1.600 persona të zhdukur gjatë luftës në Kosovë ende nuk kanë një varr. Njëzet e shtatë vjet pas përfundimit të luftës, një zonë ushtarake në Serbi — e njohur si "Livadhet e Fasules" (në serbisht Pasuljanske Livade) — është rikthyer në qendër të dyshimeve si vendndodhje e mundshme e një varreze masive.

Dyshimet i ka ringjallur themeluesja e Fondit për të Drejtën Humanitare, Natasha Kandiq, e cila përmes një postimi në rrjetin social X njoftoi se qysh në vitin 2008 kishte informuar ministrin e atëhershëm serb të Mbrojtjes, Dragan Shutanovac, për dëshminë e një personi që pretendonte se kishte transportuar trupa shqiptarësh të vrarë në Kosovë drejt bazës ushtarake në atë zonë.

Sipas Kandiqit, autoritetet serbe nuk ndërmorën asnjë veprim dhe nuk dhanë asnjë përgjigje ndaj këtyre pretendimeve — një heshtje që zgjat prej më shumë se një dekade e gjysmë.

Nga Fondi për të Drejtën Humanitare në Kosovë kërkojnë hapjen e arkivave të ushtrisë serbe, duke theksuar se vetëm qasja në dokumentacionin zyrtar mund të zbardhë fatin e të zhdukurve. "Është një numër i madh dhe bashkësia ndërkombëtare duhet të bëjë presion që palët të bashkëpunojnë me më shumë seriozitet në këtë fushë", tha Amer Aliaj nga ky fond.

"Livadhet e Fasules" nuk është lokacioni i vetëm i dyshuar. Këshilli Koordinues i Familjarëve të Personave të Zhdukur dhe Krimeve të Luftës thotë se ka edhe vende të tjera, kryesisht brenda bazave ushtarake serbe, ku dyshohet se janë varrosur viktima të luftës. Pa hapjen e arkivave dhe pa bashkëpunimin e Beogradit, zbardhja e fatit të tyre mbetet e vështirë.

Burim: Insajderi, RTK, Zëri
— Redaksia ZHURMA