Pse 'Revolucioni i Flamingove' quhet edhe 'revolucioni i grave'?

TIRANË — Marshimi i flamingove në ditën e 18-të të protestës kundër kryeministrit Edi Rama u kthye në një nga lëvizjet më të mëdha që Shqipëria ka parë që nga fillimi i viteve ’90. Aktivistja Sidorela Vatnikaj, pasi lexoi kërkesat për dorëheqjen e Ramës dhe anulimin e kuadrit ligjor për ndërtimet në zonat e mbrojtura, kujton se turma e protestuesve filloi të udhëhiqej vetë, duke u bërë një lumë i pakontrollueshëm që synon të ndryshojë ligjërimin politik.

Protesta, e nisur pas ngjarjes në Zvërnec ku një protestues u tërhoq zvarrë nga rojet private, u organizua fillimisht përballë Drejtorisë së Policisë në Tiranë. Vatnikaj tregon se priste vetëm disa dhjetra vetë, por brenda pak minutash mijëra protestues filluan të thërrisnin 'dorëheqje'. 'Revolta qytetare e akumuluar në tre dekada u bë si një lumë që po ndërtonte shtretër të rinj ligjërimi politik,' thotë ajo.

Luçiana Kokaj, aktiviste nga Rrjolli i Shkodrës, u bashkua me protestën pasi pa ngjarjet në Zvërnec dhe bëri paralelizmin me protestën lokale kundër ndërtimit të një resorti turistik në tokat e banorëve. 'Kjo nuk ishte vetëm një betejë për Zvërnecin apo Rrjollin, por për të drejtat e qytetarëve përballë arrogancës së pushtetit,' shpjegon Kokaj, e cila thekson se Policia e Shtetit nuk funksionon për të mbrojtur qytetarët.

Protesta, e njohur tashmë si 'Revolucioni i Flamingove', nuk ka një lider të vetëm dhe mbahet gjallë nga mijëra njerëz që mblidhen çdo natë në bulevard. Vajzat dhe gratë aktiviste kanë një rol gjithnjë e më të dukshëm, duke ndikuar në organizim dhe mesazh. 'Vajzat që morën iniciativën kanë bërë një punë fantastike, së bashku me djemtë dhe burrat organizatorë,' thotë Kokaj.

Gratë dhe vajzat nuk janë vetëm pjesëmarrëse, por po ndryshojnë mënyrën se si konceptohet pjesëmarrja qytetare. Vatnikaj beson se përfshirja e tyre në vijën e parë po shkatërron një sistem autokratik dhe po prodhon një imagjinatë të re politike. 'Gratë dhe vajzat janë zëri, energjia dhe forca e protestës, por edhe imazhi paqësor dhe tërheqës i saj,' thotë Kokaj.

Në Rrjoll, protestat morën një tjetër dimension kur gratë u përfshinë. 'Ditën që gratë ngritën zërin, protesta mori një tjetër prezantim, një tjetër faqe,' kujton Kokaj. Vajzat e reja, gratë me fëmijë dhe gjyshet që marrin pjesë, si dhe blogerët që i japin jehonë protestës, janë energjia dhe forca e saj.

Kjo lëvizje po emancipon shoqërinë dhe po krijon një model të ri pjesëmarrjeje qytetare, ku gratë luajnë një rol qendror. 'Revolucioni i Flamingove' nuk është vetëm një protestë kundër Ramës, por një kërkesë për një Shqipëri pa autokratë dhe oligarkë.

Burim: Reporter.al
— Redaksia ZHURMA