Pse kërkon Hykmete Bajrami anulimin e testit të maturës?
Deputetja e LDK-së thotë se provimi po favorizon kopjimin dhe kërkon zëvendësimin e tij me një sistem që bazohet në suksesin e arritur gjatë shkollimit.
PRISHTINË — Deputetja e LDK-së, Hykmete Bajrami, ka kërkuar anulimin e menjëhershëm të testit të maturës shtetërore. Ajo e ka cilësuar këtë proces si të dështuar dhe plotësisht të padrejtë për nxënësit e vyeshëm që kanë mësuar me përkushtim.
Përmes një postimi në Facebook, Bajrami ka deklaruar se publikimi i testit sapo fillon provimi është një dështim që po përsëritet tash e gjashtë vjet radhazi. Deputetja vuri në dukje se kjo gjendje e përsëritur bën që provimi të mos e vlerësojë dijen, por të favorizojë kopjimin.
Sipas saj, më të suksesshëm sot fatkeqësisht nuk dalin ata që kanë mësuar shumë, por ata që arrijnë të kopjojnë më shumë. Kjo përbën një padrejtësi të madhe ndaj mijëra nxënësve të ndershëm që kanë punuar me vite të tëra gjatë shkollimit.
Bajrami thekson se ky nuk është më thjesht një problem i organizimit të një testi, por një problem i drejtësisë në arsim. Ky proces ndikon drejtpërdrejt edhe në rrugën e regjistrimit të nxënësve në fakultet, duke ndëshkuar ata që nuk kopjojnë.
Prandaj, ajo kërkon që testi i maturës, i cili e ka humbur tërësisht besueshmërinë, të zëvendësohet me një sistem vlerësimi të bazuar në suksesin e arritur gjatë shkollimit fillor dhe të mesëm. Ajo përfundon se arsimi nuk mund të ndërtohet mbi kopjim.
Burim: IndeksOnline
— Redaksia ZHURMA
