Pse gjyqtarët e Hagës shtynë vendimin për krerët e UÇK-së?

HAGË — Gjyqtarët e Dhomave të Specializuara në Hagë kanë kërkuar afat shtesë për të dhënë vendimin në rastin e krerëve të UÇK-së, duke e shtyrë datën deri më 20 korrik. Vendimi i tyre pritej të jepej më 19 maj, por është shtyrë. Arsyetimi i tyre bazohet në kompleksitetin e çështjes dhe vëllimin e madh të provave.

Sipas dokumentit të Speciales, gjyqtarët përmendin 270 dëshmitarë, rreth 5,500 faqe prova materiale dhe gati 30,000 faqe transkripte. "Paneli vëren se gjatë procedurave mori dëshminë e afërsisht 270 dëshmitarëve (me gojë dhe me shkrim) dhe pranoi 5,497 prova materiale si prova. Transkripti i këtyre procedurave është 29,238 faqe i gjatë", thuhet në vendim.

Kompleksiteti i rastit lidhet me kohëzgjatjen e ngjarjeve — më shumë se një vit e gjysmë — dhe vendet e shumta të dyshuara për krime. "Prandaj, për të siguruar që të mund të ndërmarrë një vlerësim të plotë dhe të drejtë të të dhënave provuese dhe të ofrojë një mendim të arsyetuar siç duhet që merr parasysh vëllimin e konsiderueshëm të provave dhe kompleksitetin e procedurave, Paneli konstaton se rrethanat e çështjes kërkojnë kohë shtesë, përkatësisht 60 ditë, për shpalljen e Aktgjykimit", thuhet në vendim.

Megjithatë, ata pranojnë të drejtën e të akuzuarve për një gjykim të shpejtë sipas Nenit 21(4)(d), duke theksuar kohën e gjatë në paraburgim. "Zgjatja prej 60 ditësh justifikohet nga nevoja për të siguruar një vlerësim të drejtë, gjithëpërfshirës dhe të arsyetuar të të dhënave provuese dhe nga kërkesa për një mendim të arsyetuar me shkrim që pasqyron me saktësi atë të dhënë," thuhet në vendim.

Në Kosovë, kjo shtyrje është interpretuar si vendim politik, veçanërisht në kontekstin e zgjedhjeve. Gjyqtarët kanë lënë hapësirë për kërkesa të tjera shtyrjeje, nëse do të jetë e nevojshme. Burim: Nacionale
— Redaksia ZHURMA