Pse fermerët kërkojnë kontroll në të gjitha fabrikat e qumështit?

PRISHTINË — Kontrolli i Agjencisë së Ushqimit dhe Veterinarisë (AUV) në fabrikën "Vita" në Istog ka rikthyer në qendër të debatit përdorimin e vajit të palmës dhe qumështit pluhur në industrinë e qumështit në Kosovë.

Fermerët dhe prodhuesit vendorë kërkojnë që inspektimet të shtrihen në të gjithë sektorin, duke argumentuar se vetëm kontrollime të barabarta mund të mbrojnë konsumatorët dhe prodhimin vendor. Shoqata e Qumështarëve dhe Shoqata e Prodhuesve të Qumështit kërkojnë vazhdimin e kontrollimeve në të gjitha fabrikat përpunuese për të verifikuar përbërjen dhe cilësinë e produkteve.

Pas kontrollit të AUV-së më 2 korrik, "Vita" ndërpreu përkohësisht aktivitetin. Agjencia mori mostra të qumështit me afat të gjatë përdorimi, qumështit pluhur dhe vajit të palmës për analiza laboratorike, duke konstatuar mospërputhje me legjislacionin. Në objekt u gjetën sasi të konsiderueshme të lëndëve të para si qumësht UHT, qumësht pluhur, proteina qumështi dhe vaj palme.

Përfaqësues të "Vitës" e quajtën kontrollin "tërësisht të paligjshëm", duke e cilësuar si selektiv dhe të motivuar politikisht. Ndërkohë, Ramadan Memaj nga Shoqata e Qumështarëve thekson se problemi i përdorimit të lëndëve zëvendësuese nuk është i ri dhe kërkon kontrollime të rregullta në të gjithë sektorin.

Gani Durmishi, gjithashtu nga kjo shoqatë, kërkon që çdo produkt që nuk etiketohet qartë ose nuk përputhet me përmbajtjen e deklaruar të hiqet nga tregu. Naser Bajraktari, kryetar i Shoqatës së Prodhuesve të Qumështit, shton se kontrollimet duhet të përfshijnë të gjithë industrinë, jo vetëm një kompani.

Burime brenda AUV-së thanë për Evropën e Lirë se kontrollimet do të vazhdojnë me "zero tolerancë" për parregullsi. Problemi kishte ngritur alarm që në prill, kur fermerët paralajmëruan se 30% e qumështit vendor mbetej pa u shitur, duke fajësuar kompanitë për përdorimin e lëndëve zëvendësuese.

Ministria e Bujqësisë, më 28 prill, miratoi masa për mbrojtjen e prodhimit vendor, duke ndaluar përzierjen e qumështit të freskët me qumësht pluhur ose vaj palme dhe vendosi akcizë për qumështin pluhur. Memaj konfirmoi se kontrollimet e AUV-së janë shtuar pas këtij vendimi.

Burim: Evropa e Lirë
— Redaksia ZHURMA