Pse EFT-ja e Vuk Hamoviqit është në prag të rilicensimit në Kosovë?
Deputetja Janina Ymeri paralajmëron se kompania e biznesmenit serb po vazhdon të ndikojë në sektorin energjetik, pavarësisht deklaratave të Kurtit.
PRISHTINË — Deputetja e LDK-së, Janina Ymeri, ka paralajmëruar se kompania EFT, e lidhur me biznesmenin serb Vuk Hamoviq, ndodhet në prag të rilicensimit në Kosovë. Në një postim të dielën, Ymeri ka publikuar një dokument që, sipas saj, dëshmon se procesi i rilicensimit është duke u zhvilluar.
Ymeri ka rikujtuar deklaratën e kryeministrit Albin Kurti, i cili më parë kishte thënë se "EFT-ja duhet të marrë fund" dhe se "nuk mund t’i themi vetes shqiptarë kur vazhdon të na dominojë EFT-ja". Megjithatë, sipas deputetes, jo vetëm që kompania nuk është larguar nga tregu, por ndikimi i saj vazhdon të reflektohet në vendimmarrjet për sektorin energjetik dhe investimet ndërkombëtare.
"Kush është tash lideri shqiptar këtu, kur kompania e Vuk Hamoviqit është në proces të rilincencimit?" ka shkruar Ymeri, duke theksuar se ndikimi i EFT-së "dikton edhe përgjigjet ndaj investimeve ndërkombëtare". Debatet për politikën energjetike vazhdojnë të ndikohen nga ky kontekst.
Burim: Gazeta Metro
— Redaksia ZHURMA