Maran dhe Ismajli shprehen optimistë para ndeshjes me Finlandën

Përzgjedhësi i Shqipërisë, Rolando Maran, dhe mbrojtësi Ardian Ismajli janë shprehur optimistë në prag të përballjes me Finlandën, e programuar për t'u luajtur në stadiumin «Air Albania». Në konferencën për media, Maran vlerësoi përgatitjet dhe përkushtimin e futbollistëve kuqezi, duke theksuar se skuadra duhet të tregojë në lojë krenarinë dhe përgjegjësinë që sjell përfaqësimi i vendit. «Ne duhet të jemi të aftë ta përcjellim në fushë këtë krenari, këtë mbështetje dhe këtë përkushtim, duke e bërë me shumë përgjegjësi, sepse përfaqësojmë diçka të rëndësishme dhe këtë e dimë shumë mirë», ka deklaruar përzgjedhësi.

Optimizëm ka shprehur edhe Ardian Ismajli, i cili theksoi se Shqipëria është përgatitur shumë mirë dhe se synimi kryesor mbetet përfundimi në vendin e parë. Mbrojtësi u shpreh se ekipi ka më shumë cilësi se të gjitha skuadrat e tjera në grup, por kjo duhet dëshmuar në fushë. Duke u ndalur te ndeshja e parë kundër Finlandës, ai kujtoi se kuqezinjtë kishin zhvilluar një nga paraqitjet më të mira të viteve të fundit, por kartoni i kuq kishte ndikuar në rrjedhën e takimit. «E dimë rëndësinë. E kemi obligim për vendin e parë. Jemi ekip më kualitativ se të gjithë në grupin tonë, por duhet ta dëshmojmë në fushë», ka thënë Ismajli, duke shtuar se fati është në duart e vetë skuadrës.

Gjatë konferencës, Ismajli foli gjithashtu për qasjen e re në fushë dhe mbështetjen e madhe të tifozëve. Sipas tij, futbolli më defensiv ka ndryshuar dhe presingu i lartë e ndihmon ekipin të detyrojë kundërshtarin të gabojë. Mbrojtësi e cilësoi mbështetjen e zjarrtë në «Air Albania» si pikën më të fortë, duke nënvizuar se lojtarët nuk ndiejnë panik apo stres kur luajnë para publikut vendas. Skuadra ka analizuar edhe gabimet nga goditjet standarde dhe synon të zbatojë me saktësi detyrat e kërkuara nga stafi teknik.