Pse dështoi qeveria të kthente diasporën në 'motor zhvillimi'?

TIRANË — Një draft i ri i qeverisë shqiptare për diasporën vlerëson se strategjia e mëparshme dështoi për shkak të koordinimit të dobët institucional, mungesës së mekanizmave të monitorimit dhe burimeve financiare të pamjaftueshme. Dokumenti i Strategjisë 2026-2030 thekson se, megjithëse Shqipëria ka ngritur një kuadër ligjor dhe institucional, zbatimi ka qenë i fragmentuar.

Institucionet kanë vepruar brenda mandateve të tyre, pa një mekanizëm efektiv koordinimi, duke kufizuar ndikimin e përgjithshëm. Investimet e diasporës kanë mbetur nën pritshmëri, ndërsa mungesa e instrumenteve financiare dhe mbështetjes institucionale ka penguar shfrytëzimin e potencialit ekonomik të shqiptarëve jashtë vendit.

Strategjia pranon se marrëdhënia mes shtetit dhe diasporës ndikohet nga një nivel i ulët besimi, për shkak të burokracisë, çështjeve të pazgjidhura me pronat, pensionet dhe shtetësinë. Progresi është matur kryesisht përmes aktiviteteve, jo përmes ndikimit real të politikave, duke kërkuar krijimin e një sistemi të unifikuar monitorimi dhe statistikash.

Qeveria synon ta trajtojë diasporën si partner strategjik për zhvillim ekonomik, transferim njohurish dhe integrim evropian. Drafti propozon politika të diferencuara për brezat e ndryshëm, duke u kushtuar më shumë vëmendje profesionistëve dhe të rinjve në diasporë. Burim: Gazeta Si
— Redaksia ZHURMA