Kush mbeti në arrest pas dhunës para Kuvendit?

TIRANË — Askush nga 19 protestuesit e arrestuar pas ngjarjeve të 2 korrikut para Kuvendit nuk mbeti në qeli, pasi gjyqtari Sokol Marku vendosi arrest shtëpiak për dy persona, detyrim paraqitje për 12 të tjerë dhe lirimin e plotë për 5 persona.

Masat më të rënda të arrestit në shtëpi u caktuan për Everest Bardhin dhe Ervin Gegën. Bardhi dyshohet se ka goditur një polic të cilin e dërgoi në spital me 7 qepje, ndërsa Gega akuzohet për shkatërrimin e një automjeti të policisë.

Mes personave në detyrim paraqitje është edhe Altin Hila, për të cilin prokuroria fillimisht kërkoi arrestin në burg, por më pas e ndryshoi kërkesën për arrest shtëpiak për shkak të fëmijës së sëmurë, përpara se gjykata të vendoste detyrimin.

Mbrojtja, e përfaqësuar nga avokati Dorjan Matlija, pretendon se akuzat bazohen vetëm në raportet e policisë dhe se gjatë seancës u konstatuan shenja të dukshme dhune në trupin e arrestuarve, përfshirë mavijosje në sy dhe dëmtime në shpatulla.

Një nga të arrestuarit, Genti Progni, ka kërkuar raport mjeko-ligjor për të dokumentuar dhunën e pretenduar. Avokati Matlija deklaroi se gjatë hetimeve do të paraqesin prova shtesë për të rrëzuar pretendimet e akuzës dhe për të kërkuar hetim për trajtimin e tyre.

Të arrestuarve u ngritën pesë akuza: kundërshtim i punonjësit të policisë, prishje e qetësisë publike, shkatërrim prone, pjesëmarrje në tubim të paligjshëm dhe pengim i qarkullimit. Seanca zgjati rreth 5 orë, ndërsa jashtë ndodheshin dhjetëra mbështetës që kërkonin lirimin e tyre.

Në një koment politik, Matlija deklaroi se koha për dialog me qeverinë ka mbaruar, duke e cilësuar Kryeministrin Rama si arrogant. Ai shtoi se format e dhunshme të protestës nuk kanë prodhuar rezultatet e pritshme dhe sugjeroi ndjekjen e modeleve të tjera të organizimit.

Burim: Shqiptarja
— Redaksia ZHURMA