Kush thotë se protestat në Shqipëri kanë tejkaluar Sazanin dhe Vjosë-Nartën?

Deputeti belg Michel De Maegd ka deklaruar se protestat 41-ditore në Shqipëri kanë tejkaluar kundërshtimin ndaj projekteve turistike në Sazan dhe Vjosë-Nartë, duke u shndërruar në një kërkesë për më shumë transparencë, llogaridhënie dhe respektim të shtetit të së drejtës.

Në një intervistë për EU Perspectives, De Maegd theksoi se rruga e Shqipërisë drejt Bashkimit Evropian nuk duhet të vlerësohet vetëm mbi reformat teknike, por edhe mbi respektimin e vlerave demokratike, mbrojtjen e mjedisit, luftën kundër korrupsionit dhe pavarësinë e institucioneve.

Protestat nisën 41 ditë më parë kundër planeve për ndërtimin e infrastrukturës turistike në ishullin e Sazanit dhe në zonën Vjosë-Nartë, të dyja zona të mbrojtura natyrore. Ajo që nisi si kundërshtim ndaj një projekti të vetëm, tashmë është shndërruar në një lëvizje më të gjerë që kërkon transparencë, llogaridhënie dhe respektim të shtetit të së drejtës.

De Maegd bëri të ditur se do t’i kërkojë shpjegime ministrit belg të Jashtëm për zhvillimet në Shqipëri dhe u bëri thirrje institucioneve evropiane të monitorojnë nga afër projektet në zonat e mbrojtura, duke kërkuar transparencë të plotë, vlerësime të pavarura mjedisore dhe respektim të standardeve të BE-së.

Shqetësimet e ngritura nga qytetarët janë shqetësime thellësisht evropiane: mbrojtja e mjedisit, konsultimi publik, institucionet e pavarura, transparenca dhe lufta kundër korrupsionit. Në këtë kuptim, këto protesta nuk duhet të shihen si pengesë për rrugën evropiane të Shqipërisë.

Përkundrazi, ato tregojnë se një pjesë e rëndësishme e shoqërisë shqiptare kërkon një Shqipëri më evropiane, të bazuar në rregulla, të drejta dhe përgjegjshmëri demokratike. Nuk është roli im të ndërhyj në zgjedhjet e brendshme politike të Shqipërisë, por çdo vend që dëshiron të anëtarësohet në Bashkimin Evropian duhet t’u përgjigjet shqetësimeve të qytetarëve përmes dialogut, transparencës dhe respektimit të standardeve evropiane.

Burim: Report Tv, https://report.al/deputeti-belg-mbrojtja-e-sazanit-dhe-vjose-nartes-duhet-te-jete-kusht-per-integrimin-ne-be/

— Redaksia ZHURMA