Pse po protestojnë banorët e Reçicës së Madhe në Tetovë?
Pronarët e tokave bujqësore në Tetovë kundërshtojnë kompensimin prej 3 deri në 4 euro për metër katror për ndërtimin e Korridorit 8.
TETOVË — Banorët e Reçicës së Madhe në Tetovë protestuan pranë pikës pagesore rrugore. Tubimi u organizua si shenjë revolte ndaj vlerësimit të ulët që autoritetet u kanë bërë pronave të tyre, të cilat pritet të shpronësohen për ndërtimin e Korridorit 8.
Protestuesit sqaruan se nuk janë kundër ndërtimit të këtij aksi rrugor, por vlerësojnë se çmimi i ofruar prej 3 deri në 4 euro për metër katror është qesharak dhe i papranueshëm. Sipas tyre, këto fusha përfaqësojnë mundin e familjeve, burimin e jetesës dhe trashëgiminë që u lihet fëmijëve.
Pronarët e tokave kërkojnë kompensim të drejtë, transparencë nga institucionet dhe trajtim të barabartë për secilin qytetar të prekur. Ata i bënë apel Qeverisë së Maqedonisë dhe deputetëve që ta marrin parasysh këtë nismë, duke theksuar se nuk kanë krah tjetër për të mbrojtur punën e tyre.
Banorët theksuan se toka e tyre nuk i përket kategorive të ulëta si kategoria e pestë apo e gjashtë, por është tokë e kategorisë së parë. Ata sqaruan se ndodhen në fushë dhe jo në mal, prandaj kjo kategori e tokës ka një vlerë krejtësisht tjetër dhe duhet vlerësuar si e tillë.
Përfaqësuesit e protestës treguan se mbjellja e vetëm një metri katror të kësaj toke jep një produkt bujqësor me vlerë prej 240 denarësh. Ata shtuan se me çfarëdo të mbjelle, vlera e frutit të kultivuar do të jetë shumë më e lartë se kompensimi prej 3-4 eurosh që u ofrohet për shpronësim.
Një nga protestuesit krahasoi situatën me tarifat, duke vënë në dukje se ai paguan 30 denarë në pikën pagesore. Ai theksoi se shteti nuk bën asnjë lëshim për kalimin, ndërsa tokat e tyre po i merr me një çmim krejtësisht të ulët e të papranueshëm.
Burim: TV21
— Redaksia ZHURMA