Pse u pezulluan protestat e punëtorëve të RTK-së?

PRISHTINË — Federata Sindikale e RTK-së dhe SPERTK kanë njoftuar për pezullimin e protestës e cila ishte thirrur për sot, më 13.07.2026, shkaku i mosekzekutimit të pagave për muajin qershor. Përmes një komunikate për media, organizatorët e kësaj proteste kanë bërë të ditur se vendimi i qeverisë për miratimin e kërkesës për alokimin e ndarjeve buxhetore në vlerë prej 2.24 milionë euro për RTK-në i ka shtyrë që të pezullojnë këtë protestë.

Sipas sindikalistëve të RTK-së, ky vendim i hap rrugën tejkalimit të një situate të papranueshme, “në të cilën punëtorët e RTK-së u detyruan të punojnë 13 ditë pa paga”. Por në komunikatë thuhet se pezullimi i protestës nuk nënkupton se çështja është mbyllur.

Qeveria në detyrë e Republikës së Kosovës, më 10.07.2026, ka miratuar kërkesën për alokimin e ndarjeve buxhetore në shumë prej 2 milionë e 240 mijë euro për Radiotelevizionin e Kosovës. Në një njoftim të punëtorëve të RTK-së thuhej se kjo vonesë është shkaktuar për shkak se buxheti i RTK-se për 6-mujorin e dytë ende nuk është transferuar nga Thesari i shtetit.

Mosekzekutimin me kohë të pagave Federata Sindikale të Radio Televizionit të Kosovës (RTK) e ka quajtur të papranueshme. Kjo federatë ka thënë se nuk do të lejojnë që vonesa e pagave të shndërrohet në normalitet në RTK duke theksuar se kjo nuk është hera e parë.

Sipas Telegrafit, Federata Sindikale e Radio Televizionit të Kosovës (RTK) ka njoftuar se është pezulluar protesta e paralajmëruar për të hënën në orën 11:30, pasi Qeveria në detyrë ka miratuar alokimin e 2 milionë e 240 mijë eurove për transmetuesin publik.

Burim: Kallxo, https://kallxo.com/lajm/pezullohet-protesta-e-punetoreve-te-rtk-se/
— Redaksia ZHURMA