Kur do të dorëzohen propozimet për Kodin Zgjedhor në RMV?

SHKUP — Ministri i Drejtësisë në Maqedoninë e Veriut, Igor Filkov, ka paralajmëruar zyrtarisht se javën e ardhshme do të dorëzohen propozimzgjidhjet e artikuluara nga grupi punues për reforma në legjislacionin zgjedhor. Këto propozime do të përfshihen në tekstin e Projektligjit për ndryshimet dhe plotësimet në Kodin Zgjedhor të vendit.

Sipas njoftimit të Ministrisë së Drejtësisë, drafti do t'u dërgohet anëtarëve të Grupit të punës për njohuri shtesë dhe komente të mundshme. Ky grup ka mbajtur deri më tani tetë seanca, ku në mbledhjen e fundit janë shqyrtuar sugjerimet e institucioneve të ndryshme lidhur me këtë reformë të rëndësishme.

Kjo ecuri vjen pasi Ministria e Drejtësisë pati njoftuar në fillim të qershorit se reformat zgjedhore po hyjnë në fazën përfundimtare. Procesi po zhvillohet nën tensione të larta politike. Opozita ka zgjedhur mospjesëmarrjen në grupin punues.

Përfaqësuesit e LSDM-së nuk u paraqitën në takimin e katërt të grupit punues më 29 mars 2026. Ky veprim ishte një formë proteste ndaj votimit në Kuvend të ndryshimeve të Ligjit për Qeverinë, me të cilat u shfuqizua e ashtuquajtura “Qeveria e Przhinës”, e krijuar që nga viti 2016 si zgjidhje kalimtare.

Edhe pse kryetari i LSDM-së, Venko Filipçe, e paralajmëroi këtë vendim më 28 prill 2026, partitë e tjera insistuan që puna të vazhdojë. Për shkak të këtij bojkoti, pjesëmarrja e organizatave joqeveritare në takime ka marrë një rëndësi të veçantë, duke shërbyer si kontrollues i pavarur i të gjithë procesit reformues.

Ndryshimi i Kodit Zgjedhor është pjesë e dhjetë reformave që Qeveria e Maqedonisë së Veriut duhet t’i përmbushë deri në fund të qershorit. Ky detyrim përkon me përfundimin e afatit shtesë prej 12 muajsh të "grejs periudhës", duke shtuar presionin mbi institucionet për të përmbyllur procesin në kohë.

Burim: Portalb
— Redaksia ZHURMA