Si po e rishkruan Prokuroria e Hagës historinë e luftës së UÇK-së?

HAGË — Prokuroria Speciale në Hagë po akuzohet për rishkrim të historisë së Kosovës përmes dosjes përfundimtare ndaj krerëve të UÇK-së. Në këtë dokument prej më shumë se 700 faqesh, organet e ndjekjes pretendojnë se organizata ishte në anën e gabuar të historisë, duke shtrembëruar ngjarjet e vitit 1999.

Sipas dosjes së prokurorisë, dëshmia e ish-komandantit suprem të NATO-s, gjeneralit Wesley Clark, tregon një keqkuptim të qartë të rolit të tij si dëshmitar. Prokuroria pretendon se gjenerali ka injoruar ose refuzuar faktet që binin ndesh me bindjen e tij se UÇK-ja ishte në anën e duhur.

Kjo qasje e prokurorisë ngre pikëpyetje të mëdha për rolin e Shteteve të Bashkuara dhe aleancës perëndimore, të cilat ndërhynë ushtarakisht. Lufta e UÇK-së kundër regjimit brutal të Sllobodan Millosheviç-it po cilësohet si gabim historik, duke përfshirë në këtë vlerësim edhe sulmet ajrore të NATO-s.

Prokuroria akuzon gati 700 herë krerët e UÇK-së, përfshirë Hashim Thaçin, Kadri Veselin, Jakup Krasniqin dhe Rexhep Selimin, për synim të marrjes së kontrollit të Kosovës. Thaçi e ka quajtur pretendimin krejtësisht të pavërtetë dhe absurd, sepse pushteti i plotë ndodhej në duart e hekurta të Millosheviç-it.

Në ndërtimin e këtij rasti gjyqësor, prokuroria është mbështetur në 2356 dokumente të pranuara drejtpërdrejt nga autoritetet në Beograd. Këto materiale prokuroria i konsideron të besueshme për planifikimin e operacioneve të Serbisë, duke injoruar kështu dëshmitë zyrtare të diplomatëve dhe ushtarakëve perëndimorë.

Kjo qasje po tenton të zhvlerësojë dëshmitë e gjeneralit Clark dhe diplomatëve James Rubin e Christopher Hill. Prokuroria lartëson provat e mbledhura nga shteti që kreu krime e spastrim etnik në Kosovë, duke marrë si bosht propagandën serbe kundër luftës çlirimtare për liri.

Ish-presidenti Thaçi ka deklaruar se është e dhimbshme që prokuroria përpiqet të hedhë poshtë dëshmitë e zyrtarëve të SHBA-së, NATO-s dhe OKB-së, të cilët ishin sytë dhe veshët e Perëndimit. Ky proces po shihet si një ndërmarrje politike për të shtrembëruar të vërtetën.

Burim: Vox Kosova
— Redaksia ZHURMA