Profil i rremë sulmon Abdixhikun me akuza seksiste dhe aferë të trilluar me Kica Xhelilin

PRISHTINË — Një profil i rremë në emrin “Lule Xheli” u shfaq me sulme seksiste ndaj kryetarit të Lidhjes Demokratike të Kosovës (LDK), Lumir Abdixhiku, duke e quajtur atë “Lubomiri” dhe duke i mveshur një lidhje të trilluar me deputeten e LDK-së, Doarsa Kica Xhelili, shkruan Gazeta Metro.

Profili publikoi edhe fotografi me deputeten Kica Xhelili, duke pretenduar se “puthja e parë” mes tyre ndodhi në zyrat e LDK-së te Qafa. “Ndodh edhe kjo: Lubomiri konfirmon aferen. Puthja e pare ndodhi ne zyret e LDK te Qafa,” shkruante profili, i cili u përgjigjej edhe komentuesve duke i quajtur “militantë të Vetëvendosjes”.

Sipas Gazetës Metro, Vetëvendosje njihet prej kohësh për praninë e profileve fallso online, të përdorura për sulme e propagandë ndaj kundërshtarëve politikë. Prurja e re e këtyre profileve, disa të paraqitura si “gra”, iu vu kësaj herë LDK-së dhe kryetarit të saj.

LDK kishte paralajmëruar denoncim në polici për këto profile, duke i quajtur “kërcënime digjitale” ndaj Abdixhikut. Sipas partisë, përmes profileve të rreme dhe aktivitetit të sinkronizuar, po tentohet të krijohet artificialisht perceptim publik dhe infrastrukturë propagandistike për sulme të ardhshme politike.

“Kosova nuk guxon të lejojë që debati demokratik të zëvendësohet me manipulim digjital, propagandë anonime dhe sulme të organizuara ndaj komunikimit politik të lirë,” thuhej në reagimin e LDK-së. Partia tha se, pavarësisht sulmeve, komunikimi me qytetarët nuk do të ndalet.

Burim: Gazeta Metro
— Redaksia ZHURMA