Policia italiane arrestoi 644 persona gjatë një aksioni dyjavor

Policia e Shtetit italian përfundoi një operacion dyjavor në të gjithë vendin me arrestimin e 644 personave, mes të cilëve 575 të rritur dhe 69 të mitur. Aksioni u zhvillua në bashkëpunim me 106 drejtoritë e policisë dhe synonte parandalimin e goditjen e kriminalitetit te të rinjtë, si në veprimtarinë individuale ashtu edhe në grupe të organizuara.

Hetimet u përqendruan te të dyshuarit për vepra penale kundër personit dhe pronës, si dhe për shkelje që lidhen me armët e lëndët narkotike. Para këtij aksioni të gjerë, autoritetet kishin vendosur në shënjestër zonat e njohura për shpërndarjen e drogës dhe me frekuentim të lartë gjatë natës, ku disa nga veprimet kriminale publikoheshin në rrjetet sociale nga vetë autorët.

Gjatë aksionit, efektivët e 106 skuadrave të lëvizshme kontrolluan gjithsej 236.138 të rinj, ku 23.060 prej tyre ishin të mitur. Policia procedoi penalisht në gjendje të lirë edhe 1.695 persona, përfshirë 373 të mitur të dyshuar për përvetësim sendesh të vjedhura, mbajtje armësh apo mjetesh të rrezikshme dhe posedim droge për shpërndarje. Sipas autoriteteve, ndër veprat më të shpeshta ishin tentativat për vrasje, plagosjet, përleshjet në grup, dëmtimi i pronës, zhvatja, vjedhjet, grabitjet dhe shpërndarja e lëndëve narkotike.

Nga kontrollet në banesa dhe ambiente të tjera u sekuestruan 69,4 kilogramë kokainë, 328,44 gramë heroinë, 174,8 kilogramë kanabis dhe produkte të tjera kanabinoide, si dhe sasi më të vogla ekstazie, ketamine, amfetamine, kapsula Lyrica e benzodiazepina. Zyrtarët konfiskuan gjithashtu 269.863 euro para të gatshme, varëse ari, tableta, telefona celularë, veshje, 28 armë zjarri të shkurtra e të gjata, 210 armë të ftohta dhe 25 mjete të tjera të rrezikshme si shkopinj bejsbolli, kaçavida, spraj me spec djegës e doreza metalike.

Policia italiane njoftoi se ky operacion bën pjesë në kuadrin e masave të vazhdueshme për luftimin e kriminalitetit rinor dhe kontrollin e territoreve me risk të lartë.