Policia e Bulqizës identifikon autorin e dyshuar të zjarrvënies në Vajkal
Pas njoftimit për zjarr në malin e fshatit Vajkal, policia identifikoi dhe procedoi penalisht autorin e dyshuar, i cili u dërgua për trajtim në spital.
Redaksia ZHURMA · · 1 min lexim
Shërbimet e Komisariatit të Policisë Bulqizë reaguan pas njoftimit për zjarr në malin e fshatit Vajkal, në Njësinë Administrative Fushë-Bulqizë. Ata shkuan në vendngjarje për të mbështetur forcat zjarrfikëse dhe për të kryer hetime për zbardhjen e rrethanave dhe autorësisë.
Specialistët për Hetimin e Krimeve identifikuan si autor të dyshuar shtetasin A. M., 49 vjeç, banues në fshatin Vajkal. Materialet iu referuan Prokurorisë, ku nisi procedimi penal në gjendje të lirë, pasi ai vuan nga probleme të shëndetit mendor. I dyshuari u dërgua në Spitalin Psikiatrik Shkodër për trajtim të specializuar.
Drejtoria Vendore e Policisë Dibër u bën apel qytetarëve të mos ndezin zjarre për djegien e mbetjeve apo barishteve, pasi përhapja e flakëve mund të sjellë pasoja të rënda. Policia fton qytetarët të denoncojnë çdo rast zjarrvënieje në numrin 112, duke garantuar reagim të menjëhershëm.
