Policia arreston personin që paraqitej si zyrtar i AKI-së për të marrë para

PRISHTINË — Policia e Kosovës ka arrestuar në Prishtinë personin me inicialet D.N., i cili dyshohet se është paraqitur rrejshëm si zyrtar i Agjencisë së Kosovës për Inteligjencë (AKI) për t'i marrë vazhdimisht para një qytetari, duke i premtuar punësim në këtë institucion shtetëror.

Sipas të dhënave zyrtare të policisë, rasti i dyshuar i mashtrimit ishte raportuar fillimisht në tetor të këtij viti. Hetuesit e Njësisë së Hetimeve të Përgjithshme në Prishtinë, në koordinim të ngushtë me Agjencinë e Kosovës për Inteligjencë dhe Prokurorinë Themelore në Prishtinë, kanë ndërmarrë veprime të njëpasnjëshme hetimore, me ç'rast kanë siguruar provat dhe dëshmitë e nevojshme materializuese që çuan në identifikimin e të dyshuarit.

Sipas njoftimit të Policisë së Kosovës, i arrestuari D.N., mashkull kosovar, dyshohet se që nga fillimi i vitit 2025 e deri në momentin e raportimit të rastit, i ka kërkuar shuma të ndryshme parash një personi tjetër, po ashtu mashkull kosovar. Mashtrimi bëhej përmes premtimit të rremë se i dyshuari kishte ndikim ose mundësi për ta punësuar viktimën brenda agjencisë së inteligjencës. Pas arrestimit dhe procesit të intervistimit nga hetuesit, me vendim të Prokurorit të Shtetit ndaj të dyshuarit është caktuar masa e ndalimit për 48 orë.

Rasti po trajtohet nga organet kompetente të drejtësisë për procedurat e mëtejshme ligjore. Policia e Kosovës njoftoi se mbetet e përkushtuar në parandalimin e veprave penale, ndërsa u ka bërë thirrje qytetarëve që të tregojnë kujdes ndaj personave që pretendojnë se mundësojnë punësim në institucione publike në këmbim të parave dhe raste të tilla t'i raportojnë menjëhatë.