Rexhep Gashi vritet në aksident në Vërmicë
Si ndodhi aksidenti fatal ku humbi jetën zyrtari policor 59-vjeçar gjatë detyrës?
VËRMICË — Zyrtari policor Rexhep Gashi, 59 vjeç, ka humbur jetën në një aksident të rëndë rrugor rreth orës 02:30, në afërsi të pikëkalimit kufitar në Vërmicë, në komunën e Prizrenit.
Gashi ishte i angazhuar në detyrë dhe po patrullonte në këmbë pranë pikëkalimit kufitar. Në një moment, ndërsa tentonte të kalonte rrugën, u godit nga pjesa e përparme e një automjeti që vinte nga drejtimi Prizren – Vërmicë.
Sipas hetimeve fillestare të Policisë së Kosovës, ngasësi i automjetit nuk e kishte përshtatur shpejtësinë me kushtet e rrugës, duke shkaktuar vdekjen e menjëhershme të policit në vendin e ngjarjes. Në ngjarje kanë ndërhyrë ekipi i emergjencës, prokurori kujdestar dhe Njësia Rajonale e Trafikut Rrugor në Prizren.
Ngasësi i automjetit, i identifikuar si D.D., shtetas i Republikës së Shqipërisë, është ndaluar në mbajtje për 48 orë me urdhër të prokurorit. Rasti është referuar Prokurorisë Themelore në Prizren, ndërsa kufoma e viktimës është dërguar në IML për autopsi.
Burim: Klan Kosova
— Redaksia ZHURMA