Podujeva merr vetë përgjegjësinë për edukimin e fëmijëve me autizëm
Kryetari Shpejtim Bulliqi njoftoi se nga 1 shtatori shërbimet do të ofrohen përmes angazhimit të stafit profesional komunal.
PODUJEVË — Komuna e Podujevës do të marrë përsipër organizimin dhe ofrimin e mbështetjes edukative për fëmijët në spektrin e autizmit nga 1 shtatori i këtij viti. Ky vendim u bë i ditur nga kryetari Shpejtim Bulliqi, i cili sqaroi se procesi do të realizohet përmes angazhimit të stafit profesional komunal.
Bulliqi ka vlerësuar se ky angazhim i drejtpërdrejtë institucional është një hap i rëndësishëm për t'u dalë në ndihmë fëmijëve me autizëm dhe familjeve të tyre. Ky njoftim erdhi pas një takimi që kryetari zhvilloi me përfaqësuesit e shoqatës “AUTIZMI”, të cilët i falënderoi për përkushtimin ndër vite.
Ndonëse komuna i ka mbështetur financiarisht çdo vit, tani do të marrë përsipër përgjegjësinë e drejtpërdrejtë për trajtimin e tyre. Bulliqi shprehu gatishmërinë që bashkëpunimi me shoqatën të vazhdojë, veçanërisht për trajnimin e stafit komunal që do të angazhohet për ofrimin e kësaj mbështetjeje edukative.
Ky proces synon të garantojë shërbime më të qëndrueshme dhe profesionale për këtë kategori. Përmes kësaj nisme, autoritetet lokale në Podujevë synojnë të lehtësojnë barrën financiare dhe sociale për të gjitha familjet që përballen me sfidat e përditshme të edukimit të fëmijëve me autizëm.
Burim: Ekonomia Online
— Redaksia ZHURMA