Kuvendi i Plevlës miraton deklaratë kundër njohjes së Kosovës
Ministri malazez Marash Dukaj e kundërshtoi vendimin, duke thënë se autoritetet lokale nuk duhet të cenojnë marrëdhëniet e mira fqinjësore.
PLEVLA — Kuvendi Komunal i Plevlës në Mal të Zi miratoi deklaratë kundër njohjes së Kosovës si shtet i pavarur. Vendimi nuk ka kompetenca kushtetuese për të ndryshuar politikën e jashtme të Malit të Zi, i cili vazhdon ta njohë Kosovën si shtet.
Ministri i Administratës Publike, Marash Dukaj, kundërshtoi vendimin e këshilltarëve komunalë. Dukaj shkroi në rrjetin social X se këshilltarët komunalë të Plevlës kanë përvetësuar «elemente kushtetuese dhe juridike» që nuk u takojnë, duke shtuar se autoritetet lokale duhet të fokusohen në përmirësimin e kushteve të jetesës.
Plevla është komuna e dytë në Mal të Zi që miraton një deklaratë të ngjashme, pas Zetës. Këto dokumente nuk kanë fuqi juridike. Deklarata u propozua nga Partia Popullore Demokratike e Milan Knezheviqit, e njohur për lidhjet me Beogradin.
Teksti i deklaratës nuk kërkon në mënyrë të drejtpërdrejtë «çnjohjen» e Kosovës, por thekson se Kuvendi i Plevlës «mbetet i përkushtuar ndaj sovranitetit dhe integritetit territorial të Serbisë», duke iu referuar Rezolutës 1244 të OKB-së.
Burim: Sinjali
— Redaksia ZHURMA