Pse kundërshton peshkopi serb emrin e Adem Jasharit në aeroport?

PRISHTINË — Peshkopi i Kishës Ortodokse Serbe për diasporën në Zvicër, Andrej Çilergjiq, ka shprehur pakënaqësi ndaj emërtimit të aeroportit të Prishtinës me emrin e komandantit të UÇK-së, Adem Jashari.

Në një intervistë për portalin serb "Kossev", Çilergjiq — i lindur në Gjermani, i rritur mes botës gjermane dhe serbe, dhe dikur ndihmës i Patriarkut Pavle — tha se "sinqerisht" e pengon fakti që aeroporti mban këtë emër. "Kam lexuar diçka për këtë dhe madje edhe në qarqet perëndimore e gjithë çështja rreth Adem Jasharit nuk është krejtësisht e qartë", deklaroi ai.

Peshkopi shtroi "pyetjen e madhe" nëse Jashari "e meriton atë emër, duke pasur parasysh atë që qëndron pas figurës së tij". Kur u pyet nëse e di që figura e Jasharit është e padiskutueshme për shqiptarët, Çilergjiq u përgjigj me një kundërpyetje: "Po si mendoni ju se jam ndier unë në vitin 1980 kur erdha në Beograd, e dëgjoja... se Tito ishte babai i kombit tonë?"

Ai shtoi se "çfarë do të ndodhë pas 20 vjetësh, këtë nuk e dimë". Në intervistë, vlladika Çilergjiq nuk përmendi krimet serbe gjatë viteve 1990-të as masakrën ndaj familjes Jashari. Pretendimi i tij se populli serb "u tërhoq në konflikte e luftë civile" është në kundërshtim me faktin që nacionalizmi serbomadh ndezi katër luftëra në Ballkan në atë dekadë.

Lexo edhe: Adem Jashari — eksponati i plotë.

Burim: Telegrafi, https://telegrafi.com/vlladiken-e-kishes-ortodokse-serbe-e-pengon-qe-aeroporti-i-prishtines-bart-emrin-e-adem-jasharit/
— Redaksia ZHURMA