Përleshje me lopata në Korçë, dy persona përfundojnë në spital

KORÇË — Një sherr i dhunshëm ka ndodhur pasditen e kësaj të shtune në lagjen nr. 8 të Korçës, në rrugën “Viktimat e Ravonikut”. Fillimisht ka nisur si grindje mes fëmijësh dhe më pas është përshkallëzuar në konflikt mes fqinjëve të rritur, të cilët kanë përdorur lopata dhe mjete të tjera të forta.

Dy persona kanë mbetur të plagosur dhe janë dërguar në Spitalin Rajonal të Korçës, ku ndodhen jashtë rrezikut për jetën. Gjatë konfliktit është dëmtuar edhe automjeti i njërit prej familjarëve të përfshirë.

Policia ka mbërritur në vendngjarje dhe ka shoqëruar disa persona në Komisariatin e Korçës për të sqaruar rrethanat e ngjarjes.