Pata: Fantazmat e kandidatëve të protestës dhe zgjedhjet vendore

Sipas analistit Ylli Pata, pas dështimit të objektivit të djegies së Tiranës, dy komponentët kryesorë të opozitës, Partia Demokratike e Sali Berishës dhe Lëvizja e Bashkë e Arlind Qorit, po vijojnë të thërrasin protesta periodike kryesisht fundjavave. Ky aksion politik permanent synon të shërbejë si motor politik për zgjedhjet vendore, ku po tentohet të përdoret koncepti i kandidatit të protestës si një zgjidhje që i përshtatet logjikës së masës dhe njerëzve që kanë dalë në shesh që prej muajit qershor.

Në analizën e ngjarjeve, Pata vëren se ky koncept nuk mbështetet realisht te vijueshmëria e protestës, e cila ka degraduar në zjarr e dhunë dhe në një protestim me rotacion sipas kalendarit të ardhjeve nga Europa, Kosova apo Maqedonia e Veriut, në varësi të fondeve të alokuara. Ai shton se i ashtuquajturikursi i revolucionit të flamingove nuk ka prodhuar një lëvizje politike kohezionale dhe as një pamflet politik si zë i përgjithshëm.

Sipas autorit, protestat nuk lindën si organizim i brendshëm, por si një operacion i jashtëm marketingut që u përkrah nga lobet radikale të demokratëve amerikanë, e majta europiane dhe Islami politik, i sponsorizuar nga organizata me lidhje direkte me Vëllazërinë Muslimane. Si fakt shtesë, Pata përmend se vendimi i Gjykatës Egjiptiane ka sanksionuar ndër të tjera tri shoqata të lidhura me politikën, të aktivizuara në këtë lëvizje, të vendosura përkatësisht në Tiranë, Prishtinë dhe Shkup.

Aktorët vendas dhe pjesëmarrësit në terren nuk e patën kurrë pavarësinë për t'u artikuluar apo promovuar si zgjidhje politike, pasi kishin leje vetëm për të synuar rrëzimin e kryeministrit Edi Rama, shkruan analisti. Detajet e këtij operacioni vinin si shabllon i gatshëm nga qendra të caktuara, ndërsa në rrjetet sociale shpërndahej propagandë hibride që sulmonte figura të ndryshme ose Izraelin, pa promovuar ndonjëherë logjikën e një kuvendi politik ndërtimi.

Mosarritja e këtij objektivi ka sjellë pikëpyetje dhe aktivizim të skenareve rezervë që kanë qenë të munguar ose të improvizuar, duke e bërë sipas tij absurd kërkimin e një përfaqësie politike nga kjo protestë për zgjedhjet lokale. Pata thekson se duke qenë se nuk ka pasur një përfaqësi reale, emrat dhe kandidatët e dalë prej saj nuk janë veçse fantazma që i shërbejnë një agjende të një operacioni fantazmë.