Paralajmërohet protestë gjatë konferencës së Gërvallës dhe Sveçlës
Aktivistët paralajmërojnë protestë para Zyrës së Kryeministrit në orën 09:00, në kohën e konferencës së ministrave pas vrasjes së Arlinda Zekajt.
Redaksia ZHURMA · · 1 min lexim
Ministrja e Drejtësisë, Donika Gërvalla, dhe ministri i Punëve të Brendshme, Xhelal Sveçla, do të mbajnë konferencë të përbashkët për media në Zyrën e Kryeministrit, pas dorëzimit të raporteve të detajuara për rastin e vrasjes së Arlinda Zekajt. Konferenca është caktuar për orën 09:00, ndërsa kryeministri Albin Kurti tashmë i ka pranuar raportet nga dy ministritë.
Në dy ditët e kaluara janë mbajtur protesta pas vrasjes së Arlinda Zekajt në Vitomiricë të Pejës nga ish-kunati. Protestuesit po kërkojnë shkarkime, dorëheqje dhe ndjekje penale, duke kërkuar llogaridhënie edhe nga ministrja Gërvalla e ministri Sveçla. Deri tani janë suspenduar nga detyra kryeprokurorja e Pejës, Lumturije Vuçetaj, prokurorja e rastit Arlinda Nallbani-Gacaferri, si dhe 11 policë.
Aktivistja Liridon Sijarina ka paralajmëruar se protesta e nesërme do të zhvendoset për në orën 09:00, në kohën e konferencës së dy ministrave. Ajo u ka bërë thirrje protestuesve që të mblidhen përsëri para objektit të Qeverisë, duke deklaruar se nuk do të zmbrapsen pa u adresuar kërkesat e tyre.
