Musliu kërkon shkarkimin e Gërvalles pas mungesës në mbledhjen e Qeverisë

Deputetja e Partisë Demokratike të Kosovës (PDK), Ganimete Musliu, ka kërkuar shkarkimin e menjëhershëm të zëvendëskryeministres dhe ministres së Drejtësisë, Donika Gërvalla, pas mungesës së kësaj të fundit në mbledhjen e Qeverisë ku u miratua themelimi i një grupi punues për mbështetjen institucionale në mbrojtje të ish-krerëve të Ushtrisë Çlirimtare të Kosovës në Hagë.

Musliu ka shkruar se «GËRVALLA DUHET TË SHKARKOHET!», duke shtuar se ajo mungoi edhe në ditën kur u votua Ligji për Dhomat e Specializuara. Sipas deputetes, mungesa e ministres përbën goditje ndaj besueshmërisë së angazhimit shtetëror për mbrojtjen e çlirimtarëve. Musliu vlerësoi se mbrojtja e ish-krerëve të UÇK-së kërkon seriozitet dhe përgjegjësi shtetërore, ndërsa përfundoi se ajo ka zgjedhur të jetë në anën e kundërt të historisë.