Papa Leo XIV doli nga spitali pas operacionit në mushkëri

Papa Leo XIV është larguar nga spitali Gemelli në Romë pasditen e së shtunës, katër ditë pas një operacioni për heqjen e një tumori kanceroz në mushkërinë e djathtë. Njoftimi zyrtar nga Vatikani konfirmoi se ekzaminimet imazherike dhe analizat e gjakut treguan përmirësim të gjendjes shëndetësore, duke mundësuar rikthimin e tij në banesë për vazhdimin e rikuperimit.

Siç raportoi Zhurma më 11 tetor 2026 te Papa Leo XIV do t’i nënshtrohet një operacioni në mushkëri, kreu i Kishës Katolike kishte njoftuar paraprakisht për ndërhyrjen e planifikuar mjekësore, pasi gjatë një kontrolli rutinë i është zbuluar një nyjëz në mushkëri.

Ndërhyrja kirurgjikale e së martës zgjati rreth 90 minuta, ndërsa i gjithë procesi në sallën e operacionit zgjati afërsisht tri orë, njoftoi zyra e shtypit e Selisë së Shenjtë. Mjekët realizuan heqjen e lobit të poshtëm të mushkërisë së djathtë dhe konfirmuan se bëhej fjalë për adenokarcinomë, që konsiderohet lloji më i zakonshëm i kancerit të mushkërive. Ekipi mjekësor saktësoi se operacioni përfundoi me sukses dhe pa komplikime, por mbeten në pritje të rezultateve për të parë nëse sëmundja është përhapur në nyjet limfatike ose përtej pjesës së hequr.

Gjatë largimit nga spitali Gemelli, Papa 71-vjeçar, i cili u zgjodh në maj të vitit 2025, ka përshëndetur qytetarët nga brenda automjetit të tij, sipas raporteve nga Vatikani. Po ashtu, Selia e Shenjtë bëri me dije se të premten Papa zhvilloi një bisedë telefonike me presidentin rus Vladimir Putin, ku kërkoi armëpushim në Ukrainë dhe shprehu shqetësim për situatën humanitare në qytetin e Oleshky-t.

Udhëheqësi i Kishës Katolike pritet të shfaqet në publik të dielën në orën 12:00, për të drejtuar lutjen e përjavshme Angelus me pelegrinët në Sheshin e Shën Pjetrit. Po ashtu, Vatikani konfirmoi se po vijojnë përgatitjet për vizitën e tij të planifikuar nga 6 deri më 17 nëntor në Uruguai, Argjentinë dhe Peru.

Lidhur me vazhdimësinë e punës, sekretari i Shtetit të Vatikanit, kardinali Pietro Parolin, deklaroi se Papa mund të ketë nevojë të përshtatë ritmin e angazhimeve të tij në të ardhmen, në varësi të ecurisë së shëndetit.