Ministria e Mjedisit shtrëngon rregullat për festivalet — kërkohet garanci financiare
Ministria e Mjedisit ka vendosur rregulla të reja për mbrojtjen e mjedisit gjatë festivaleve dhe koncerteve
PRISHTINË — Ministrja në detyrë e Mjedisit, Fitore Pacolli, ka bërë të ditur se janë vendosur rregulla të reja për organizatorët e ngjarjeve publike, me qëllim mbrojtjen e mjedisit gjatë festivaleve, koncerteve dhe aktiviteteve të tjera. Pacolli ka thënë se çdo organizator nga tani do të jetë i obliguar të sigurojë menaxhim të duhur të mbeturinave, pastrim të hapësirave pas përfundimit të aktiviteteve dhe respektim të standardeve për zhurmën, ajrin, ujin dhe natyrën.
Sipas Pacollit, mbrojtja e mjedisit është standard që duhet respektuar nga secili organizator i ngjarjeve publike. Për aktivitetet me ndikim më të madh, komunat do të mund të kërkojnë edhe garanci financiare për rehabilitimin e hapësirave.
Zhvillimi i jetës kulturore dhe argëtuese duhet të ecë krah për krah me mbrojtjen e mjedisit. Pacolli ka theksuar se do të jenë të pakompromis në zbatimin e këtyre masave, sepse një mjedis i pastër është përgjegjësi e përbashkët dhe detyrim ndaj brezave që vijnë.
Ministria e Mjedisit, Planifikimit Hapësinor dhe Infrastrukturës ka njoftuar se ka nxjerrë një vendim met masa të detyrueshme për organizatorët e festivaleve, koncerteve dhe aktiviteteve të tjera publike, me qëllim mbrojtjen e mjedisit.
Burim: Ekonomia Online
— Redaksia ZHURMA