Pacolli mohon akuzat për punësim, e quan incizimin montazh
Në incizimin e 'Debat Plus' dëgjohet edhe zyrtari komunal Gentrit Syla; Pacolli fajëson Dejona Mihalin dhe Vetëvendosjen për rrjedhjen.
PRISHTINË — Egzon Pacolli, shefi i grupit të asamblistëve të Lidhjes Demokratike të Kosovës (LDK) në Kuvendin Komunal të Prishtinës, mohoi se i kishte premtuar punësimin bashkëshortes së një delegati të partisë, pas publikimit të një audio-incizimi në emisionin "Debat Plus".
Në incizim dëgjohet një bisedë mes Pacollit, zyrtarit të Komunës së Prishtinës, Gentrit Syla, dhe një delegati të LDK-së, ku pretendohet se diskutohej punësimi i bashkëshortes së delegatit përmes një konkursi. I lidhur me telefon në emision, Pacolli tha se nuk ka kompetencë të punësojë askënd: "Nuk bëj premtime si Lumir Abdixhiku."
Pacolli pretendoi se incizimi është montuar dhe përdoret për ta shantazhuar atë dhe bashkëpunëtorët e tij, pas qëndrimeve të tyre kundër kryetarit të LDK-së, Lumir Abdixhiku.
Pacolli u shpreh: "Ky incizim që paska dalë, unë nuk jam i përfshirë fare. Më ka thirrur Gentriti për një çështje krejt tjetër, por për çfarë e ka përdorur grupi montues i Lumir Abdixhikut, unë nuk e di. Këto janë metoda të Dejona Mihalit dhe Lëvizjes Vetëvendosje, edhe metodat e punësimit edhe të incizimit. Unë nuk jam person që punësoj njerëz aty."
Burim: Lajmi.net
— Redaksia ZHURMA