Çfarë shkelje gjobiti Pacolli me 5 mijë euro në Matiqan të Prishtinës?

PRISHTINË — Ministrja në detyrë e Mjedisit dhe Planifikimit Hapësinor, Fitore Pacolli, ka njoftuar se Inspektorati i Ministrisë së Mjedisit ka shqiptuar gjobë prej 5 mijë euro ndaj Drejtorisë së Urbanizmit dhe Mjedisit në Prishtinë. Gjoba vjen për shkak të zhvillimit të aktivitetit në deponinë e inerteve në Matiqan në kundërshtim me dispozitat ligjore për mbrojtjen e ujërave dhe mjedisit.

Sipas Pacollit, inspektorati ka konstatuar punime dhe depozitime materialesh inerte pa përmbushjen e obligimeve ligjore dhe pa dokumentacionin e nevojshëm për leje ujore. Ajo shtoi se, përkundër vendimeve dhe urdhrave të mëhershëm të inspektoratit, aktiviteti në këtë zonë ka vazhduar.

"Mbrojtja e mjedisit dhe e pasurive ujore është obligim ligjor për secilin nivel të qeverisjes", ka deklaruar Pacolli, duke premtuar se do të vazhdojë të mbështesë veprimet e inspektoratit "pa dallim".

Burim: Zëri
— Redaksia ZHURMA