OVL UÇK e quajnë Zelenskyn komedian pas qëndrimit kundër njohjes së Kosovës

PRISHTINË — Organizata e Veteranëve të Luftës së UÇK-së ka reaguar ashpër ndaj deklaratës së presidentit të Ukrainës, Volodymyr Zelensky, i cili gjatë vizitës së tij në Serbi konfirmoi se qëndrimi i shtetit ukrainas për mosnjohjen e Kosovës mbetet i pandryshuar. OVL UÇK e ka cilësuar këtë qëndrim si hapur anti-Kosovë, duke rikujtuar se profesioni i dikurshëm i liderit ukrainas po reflektohet në qasjen e tij politike aktuale ndaj vendit.

Organizata e veteranëve ka përmendur ndërhyrjen e botës demokratike të udhëhequr nga Shtetet e Bashkuara të Amerikës dhe NATO-s në pranverën e vitit 1999, e cila sipas tyre ndali spastrimin etnik dhe gjenocidin e ushtruar nga forcat serbe në Kosovë. Po ashtu, u theksua se më 17 shkurt 2008 Kosova shpalli zyrtarisht pavarësinë, e cila sot gëzon njohjen e 121 shteteve anëtare të Organizatës së Kombeve të Bashkuara.

Në reagimin e tyre, veteranët e luftës kanë sjellë në vëmendje edhe vendimin e Gjykates Ndërkombëtare të Drejtësisë në Hagë të datës 22 korrik 2010. Sipas këtij institucioni të lartë global të drejtësisë, u konstatua se Deklarata e Pavarësisë së Kosovës nuk ka shkelur të drejtën e përgjithshme ndërkombëtare, Rezolutën 1244 dhe as Kornizën Kushtetuese të vendit.

Reagimi i OVL UÇK-së vjen në një kohë kur Kievi zyrtar vazhdon të ruajë distancë diplomatike nga Prishtina zyrtare, pavarësisht mbështetjes së gjerë që institucionet dhe populli i Kosovës i kanë dhënë ukrainasve në përballjen e tyre kundër agresionit dhe pushtimit ushtarak rus.

Burim: Demokracia
— Redaksia ZHURMA