Osmani: Arlindën e lanë në duart e vdekjes, pronarin e lopës e arrestojnë

Deputetja e LDK-së, Vjosa Osmani, ka reaguar ashpër ndaj institucioneve të drejtësisë dhe sigurisë, duke vënë në pah arrestimin e një qytetari pasi lopa e tij hyri në oborrin e Gjykatës në Graçanicë dhe kullosti bar. Përmes një postimi në rrjete sociale, ajo ka bërë një krahasim mes këtij rasti dhe dështimit të shtetit për të mbrojtur Arlinda Zekajn, e cila u vra në Pejë.

Osmani i ka cilësuar veprimet e organeve kompetente si drejtësi të përmbysur dhe logjikë mesjetare, duke shprehur qëndrimin e saj me këto fjalë: «Arlindën e lanë në duart e vdekjes. Pronarin e lopës që kullot bar e arrestojnë! Kjo është logjika e tyre. Viktima pa mbrojtje. Lopa me pronar në pranga! Logjikë mesjetare. Drejtësi e përmbysur! Kur institucionet dinë të mbrojnë kullotën nga lopa, por jo jetën e njeriut, kemi prekur fundin».