Orbán rizgjidhet në krye të Fidesz si kandidat i vetëm

BUDAPEST — Viktor Orbán është rizgjedhur të shtunën në krye të partisë hungareze Fidesz për një mandat të ri njëvjeçar. Në një garë pa asnjë kandidat tjetër kundërshtar, 62-vjeçari ka ndjekur kështu të njëjtin shembull politik të kreut të Partisë Demokratike në Shqipëri, Sali Berisha, duke drejtuar i vetëm.

Kjo rizgjedhje e Orbánit vjen pas një goditjeje të fortë elektorale, ku partia e tij humbi zgjedhjet parlamentare të 12 prillit në Hungari. Humbja vuri në pikëpyetje të ardhmen e tij politike, duke nxitur kërkesa të pazakonta nga ish-bashkëpunëtorët e tij besnikë për t'u tërhequr përfundimisht nga skena politike.

Sipas të dhënave të MTI-së, Orbán mori votat e 729 delegatëve nga 737 që morën pjesë në kongres. Përpara votimit, lideri hungarez deklaroi prerazi se nuk dorëzohet kurrë, mirëpo ndryshe nga Berisha, ai të paktën mori përgjegjësinë për rezultatin e dobët në zgjedhjet e fundit parlamentare.

Megjithatë, pozita e partisë konservatore Fidesz po shkon drejt rënies së mëtejshme, siç konfirmojnë edhe sondazhet e opinionit publik. Një anketë e Institutit Publicus e kryer në maj tregon se mbështetja për Fidesz ka rënë në vetëm 17% nga 39% që kishte marrë në zgjedhjet e prillit.

Nga ana tjetër, partia rivale Tisza ka shënuar rritje, duke arritur në 55% të mbështetjes popullore krahasuar me 53% që mori në zgjedhje. Rënia e vazhdueshme e Fidesz pas humbjes elektorale tregon se modeli i "demokracisë joliberale" të Orbánit po përballet me një krizë të paprecedentë besimi.

Burim: ABC News
— Redaksia ZHURMA