Operacion ndërkombëtar, goditet rrjeti i trafikimit të emigrantëve
Dhjetë të arrestuar në Greqi pas shkatërrimit të një rrjeti që kalonte emigrantë përmes Shqipërisë.
Redaksia ZHURMA · · Përditësuar · 2 min lexim
Një organizatë kriminale e fokusuar te kalimi i paligjshëm i kufirit përmes territorit shqiptar është çmontuar gjatë një aksioni të përbashkët mes strukturave greke dhe Europolit. Operacioni zgjati në Selanik dhe në zonën e Thesprotisë, ku përfunduan në pranga dhjetë persona, përfshirë shtatë shtetas grekë, dy sirianë dhe një grua 33-vjeçare nga Shqipëria. Sipas autoriteteve, grupi funksiononte prej qershorit të vitit 2025 dhe kishte realizuar 41 raste të kalimeve të parregullta, duke transportuar mbi 500 njerëz kryesisht nga Kina, Nepali dhe Jemeni.
Emigrantët detyroheshin të përshkonin në këmbë shtigje të thepisura malore nga vendi ynë drejt Greqisë, ndërsa vëzhgimi i lëvizjeve të tyre dokumentohej nga policia edhe përmes dronëve. Pasi mbërrinin në Thesproti, pjesëtarët e rrjetit i akomodonin përkohësisht në çadra të improvizuara ose banesa, duke u shitur ushqime, ujë dhe karta telefonike me tarifa shumë të larta. Më pas, ata dërgoheshin në Athinë, Patra dhe rajone bujqësore të Peloponezit për të punuar pa dokumente, kurse trafikantët u bllokonin pasaportat derisa të shlyenin borxhin e udhëtimit.
Përfitimet e paligjshme të këtij rrjeti kalkulohen në të paktën 750 mijë euro, ndërsa gjatë ndërhyrjes ranë në pranga edhe 21 emigrantë pa dokumente. Krahas këtyre, uniformat blu sekuestruan automjete, aparate celulare, shuma parash dhe pasaporta, ndërkohë që hetimet vijojnë për zbulimin e personave të tjerë të përfshirë.
