Pse 100 eurot nuk sjellin zhvillim të qëndrueshëm sipas Odës Amerikane?
Institucioni i biznesit kundërshton masat e njëhershme financiare, kërkon investime në infrastrukturë dhe energji.
PRISHTINË — Oda Ekonomike Amerikane në Kosovë ka kritikuar varësinë në rritje nga masat e njëhershme të mbështetjes financiare si përgjigje ndaj inflacionit, duke e quajtur shpërndarjen e 100 eurove lehtësim afatshkurtër që nuk adreson problemet strukturore të ekonomisë.
Në një reagim publik, Oda Amerikane pranon se mbështetja për kategoritë e cenueshme dhe ruajtja e fuqisë blerëse janë të rëndësishme, por thekson se politikat që stimulojnë konsumin afatshkurtër kanë ndikim të kufizuar afatgjatë. Sipas saj, në ekonominë e Kosovës rritja e konsumit shpesh përkthehet në rritje të importeve, jo të prodhimit vendor apo investimeve.
"Oda Ekonomike Amerikane në Kosovë beson fuqishëm se masat të cilat fokusohen kryesisht në stimulimin e konsumit afatshkurtër rrezikojnë të prodhojnë ndikim të kufizuar afatgjatë ekonomik", thuhet në reagim.
Institucioni rekomandon që fondet publike të orientohen drejt investimeve strategjike në infrastrukturë, energji, digjitalizim, arsim dhe zhvillim të fuqisë punëtore, duke argumentuar se fuqizimi i sektorit privat sjell vende të reja pune, rritje graduale të pagave dhe përmirësim të kushteve të punës.
Burim: Zëri
— Redaksia ZHURMA