Nufi prezanton nismën e klasave sportive në Akademinë e FA

TIRANË — Ministri i Mbrojtjes, Ermal Nufi, prezantoi më 3 gusht nismën për krijimin e klasave sportive si program ekstrakurrikular në strukturat dhe Akademinë e Forcave të Armatosura, gjatë takimit me sportistët elitarë pjesë e FA-së, ku diskutoi përfshirjen e tyre në përgatitjen e kadetëve dhe personelit ushtarak.

Në bashkëbisedim ishte edhe shefi i Shtabit të Përgjithshëm, gjenerallejtënant Arben Kingji. Nisma synon zhvillimin fizik e psikologjik të kadetëve e ushtarakëve, rritjen e performancës sportive të personelit, promovimin e sportit në FA, krijimin e ekipeve përfaqësuese në aktivitete sportive dhe transferimin e përvojës së sportistëve te brezi i ri.

Ministri theksoi se angazhimi i kampionëve në përgatitjen e kadetëve do të sjellë përfitime në rritjen e kapaciteteve fizike, psikologjike dhe profesionale të FA-së. “Përvoja e sportistëve elitarë do të kontribuojë në përmirësimin e metodave të stërvitjes, forcimin e disiplinës, frymës së garës dhe përgatitjes për përballimin e sfidave operacionale, emergjencave civile dhe misioneve ndërkombëtare”, u shpreh Nufi.

Sportistët do të angazhohen vullnetarisht si pedagogë të jashtëm, trajnerë, mentorë, lektorë motivues apo konsulentë teknikë, në bashkëpunim me AFA-n, Komitetin Olimpik Kombëtar Shqiptar dhe federatat sportive. Programi përfshin disiplina si xhudo, mundje, boks, taekwondo, karate e sporte ekipore. “Modeli i tyre i suksesit, përkushtimit dhe profesionalizmit është një frymëzim për brezat e rinj”, nënvizoi ministri.

Burim: ATSH
— Redaksia ZHURMA