Shkupi ende i mbushur me degë e mbeturina, një javë pas stuhisë
Banorët ankohen për degë e mbeturina në rrugë, ndërsa komuna thotë se ka larguar shumicën e dëmeve nga stuhia e së martës së kaluar.
SHKUP — Një javë pasi një stuhi e fuqishme goditi kryeqytetin të martën e kaluar, degë, pemë të rrëzuara, gjethe e mbeturina vazhdojnë të gjenden në shumë rrugë e trotuare të qytetit. Banorët ankohen se ende nuk po ndërmerren masat e duhura për largimin e druve, gjë që po pengon qarkullimin.
"Nuk janë duke punuar, gjithë drunjtë në rrugë ishin, asgjë nuk punojnë", tha një qytetar. Një tjetër u shpreh ende më ashpër: "Kjo është katastrofë e madhe, as dritaret nuk mund t'i hapim, as gjumë nuk mund të bëjmë. E lus kryetarin t'i largojë këto."
Një banor tjetër e vuri theksin te ana mjedisore: mbeturinat dhe degët e rrëzuara nga era e fortë duhet të trajtohen sa më shpejt, përndryshe kthehen në problem ekologjik. Qytetarët i bënë thirrje institucioneve përgjegjëse që të përshpejtojnë largimin e mbetjeve nga çdo cep i rrugëve, në mënyrë që situata të kthehet në normalitet.
Autoritetet komunale thonë se kanë larguar shumicën e dëmeve të shkaktuara nga stuhia e së martës së kaluar, ndërsa në disa pjesë të qytetit puna për pastrim ende vazhdon.
Burim: Alsat-M
— Redaksia ZHURMA