Nis shqyrtimi i buxhetit të vitit 2027 në RMV me mbi 300 amendamente

Komisioni Parlamentar për Financat dhe Buxhetin ka filluar shqyrtimin në lexim të dytë të Propozimit të Buxhetit të vitit 2027, ku propozuesit e autorizuar kanë dorëzuar mbi 300 amendamente. Debati parlamentar në këtë komision do të zgjasë dhjetë ditë, ku maksimumi katër ditë janë planifikuar për diskutimin e përgjithshëm dhe gjashtë ditë janë caktuar për shqyrtimin e amendamenteve.

Sipas propozimit buxhetor, të ardhurat janë planifikuar në 395.4 miliardë denarë, duke shënuar një rritje prej 5.7 përqind kundrejt vitit 2026, ndërsa shpenzimet parashikohen në 440.4 miliardë denarë ose 4.8 përqind më shumë. Deficiti buxhetor llogaritet në 45 miliardë denarë, që përkon me 3.5 përqind të BPV-së në përputhje me Strategjinë Fiskale për periudhën 2027–2031, kurse për shpenzimet kapitale janë parashikuar 40.8 miliardë denarë. Të ardhurat nga tatimet llogariten në 223.1 miliardë denarë, me një rritje prej 6.4 përqind. Transfertat sociale janë planifikuar në 220.8 miliardë denarë, ku 123.8 miliardë denarë shkojnë për pensionet, duke shënuar rritje prej 4.8 përqind sipas harmonizimit ligjor.

Gjatë vitit 2027, shteti duhet të shlyejë një borxh prej 124.6 miliardë denarë, përfshirë 46.5 miliardë denarë borxh të jashtëm, ndërsa për shlyerje është parashikuar edhe eurobondi prej 500 milionë eurosh i emetuar në vitin 2023. Për financimin e deficitit dhe detyrimeve, planifikohet huamarrja e brendshme prej 36.3 miliardë denarë, 60 miliardë denarë shtesë për letrat me vlerë qeveritare njëvjeçare që duhet të shlyhen, si dhe huamarrja e jashtme prej 86.8 miliardë denarë.