Kuvendi i Nikshiqit rrëzon nismën për tërheqjen e njohjes së Kosovës

NIKSHIQ — Kuvendi Komunal i Nikshiqit ka refuzuar një iniciativë të Partisë Demokratike Popullore (DNP), e udhëhequr nga Milan Knezheviq, që kërkonte miratimin e një deklarate për "tërheqjen e njohjes" së Kosovës nga Mali i Zi, duke argumentuar se komuna nuk ka kompetencë ligjore për çështje të tilla ndërshtetërore.

Në propozimin e DNP-së, vendimi i Malit të Zi për njohjen e Kosovës në vitin 2008 cilësohej si "kundër vullnetit të shumicës së qytetarëve", ndërsa Kosova përshkruhej si "pjesë e pandashme e Serbisë". Partia NSD, pjesë e pushtetit lokal në Nikshiq, e kundërshtoi hapur këtë nismë.

NSD tha se njohja apo tërheqja e njohjes së një shteti mbetet kompetencë ekskluzive e institucioneve qendrore, jo e vetëqeverisjes lokale, duke rikujtuar se të njëjtin qëndrim e kishte mbajtur edhe në vitin 2012, kur kishte kundërshtuar një nismë të ngjashme.

"Ne thamë atëherë, ashtu siç themi edhe tani, se kjo nuk është në kompetencë të vetëqeverisjes lokale. Ata që besojnë se komunat e kanë njohur Kosovën dhe se tani duhet ta tërheqin njohjen, mund të vazhdojnë me iniciativa të tilla, por kjo nuk do të ndodhë në Nikshiq", tha NSD-ja në përgjigjen e saj zyrtare ndaj propozimit të DNP-së.

Sipas së përditshmes malazeze Pobjeda, zyrtarë të Bashkimit Evropian i kanë përcjellë në mënyrë jozyrtare autoriteteve malazeze shqetësimin për nismat e tilla, duke paralajmëruar pasoja për integrimin evropian të Malit të Zi. Asnjë deklaratë zyrtare e BE-së nuk e ka konfirmuar këtë deri më tani.

Burim: Gazeta Metro
— Redaksia ZHURMA