Nikolloski: Operatori 4iG do të lidhet drejtpërdrejt me Starlink

Operatori i ri celular në Maqedoni do të përdorë rrjetin satelitor Starlink, në pronësi të miliarderit Elon Musk. Lajmin e bëri të ditur ministri Aleksandar Nikolloski, duke deklaruar se kompania e telekomunikacionit 4iG ka njoftuar një bashkëpunim strategjik dhe se Maqedonia do të jetë ndër vendet e para ku kjo teknologji do të aplikohet drejtpërdrejt.

Nikolloski tha se për momentin kompania po përdor me qira stacione bazë, ndërsa pas përfundimit të testimit, lidhja do të kalojë drejtpërdrejt përmes satelitëve të Elon Musk. Ai theksoi se Maqedonia dhe Mali i Zi do të jenë vendet e para ku Starlink-u do të përdoret në mënyrë të drejtpërdrejtë për shërbimet celulare dhe internetin.

Ministri u përgjigj se marrëveshja është e natyrës komerciale dhe nuk ka rrezik që Musk të ndërpresë aksesin, siç ka ndodhur në Ukrainë. Nikolloski përmendi edhe shpjegimet e Sekretarit Rubio, duke theksuar se pjesa tregtare ndryshon nga ajo ushtarake dhe shtetërore.

Në lidhje me ndikimin e inspektimeve të paralajmëruara nga qeveria hungareze në planin e investimeve të 4iG në Maqedoni, Nikolloski tha se kompania ka afat deri në mars 2027 për të mbuluar të paktën një qytet, duke zgjedhur Shkupin si qytetin e parë.