Pse neurologu pediatrik po e quan trotinetin elektrik rrezik për fëmijët?

PRISHTINË — Neurologu pediatrik dr. Haki Jashari ka ngritur alarmin për rritjen e aksidenteve me trotinetë elektrikë, duke bërë të ditur se javëve të fundit janë regjistruar raste të lëndimeve shumë të rënda, madje edhe me përfundim fatal.

"Si mjek dhe prind, u bëj thirrje prindërve që të mos i konsiderojnë trotinetët elektrikë si lodra."

Sipas tij, trotineti elektrik nuk duhet të konsiderohet lodër, pasi mund të arrijë shpejtësi të konsiderueshme dhe të shkaktojë trauma serioze të kokës, dëmtime të shtyllës kurrizore, fraktura dhe pasoja të përhershme për shëndetin.

Jashari rikujton se përdorimi i trotinetëve elektrikë në rrugë publike nuk lejohet për personat nën moshën 16-vjeçare, por thekson se shpesh shihen fëmijë shumë më të vegjël duke i përdorur ato. Përdorimi i helmetës dhe pajisjeve mbrojtëse duhet të jetë i domosdoshëm, nëse paraprakisht është arritur mosha e lejuar.

Neurologu ka kërkuar nga institucionet përgjegjëse që të forcojnë zbatimin e ligjit, kontrollet në terren dhe fushatat vetëdijesuese. "Çdo lëndim i rëndë, e sidomos çdo jetë e humbur, është një tragjedi që shpesh mund të parandalohet", thekson ai.

Burim: Zëri, http://www.zeri.info/aktuale/627475/neurologu-pediatrik-ngre-alarmin-trotinetet-elektrike-po-shkaktojne-lendime-te-renda-te-femijet/
— Redaksia ZHURMA