Kombëtarja vazhdon përgatitjet për Ligën e Kombeve, Asllani dhe Cake me programe të veç…
Kuqezinjtë zhvilluan seancë taktike në Shtëpinë e Futbollit; Asllani bëri rikuperim muskulor, Cake monitorohet pas shqetësimi në kofshë, ndeshja me Bjellorusinë të premten.
Kombëtarja shqiptare ka vazhduar sot punën në kuadër të përgatitjeve për katër sfidat e ardhshme të UEFA Nations League. Kuqezinjtë zhvilluan një seancë stërvitore pasditen në ambientet e "Shtëpisë së Futbollit" nën udhëheqjen e trajnerit Maran dhe stafit teknik.
Vetëm dy lojtarë nuk u stërvitën rregullisht me grupin. Kristjan Asllani ka kryer stërvitje të diferencuara për rikuperim muskulor, ndërsa sipas stafit mjekësor nuk ka asgjë serioze. Klisman Cake, gjatë stërvitjes së djes, ka ndjerë një shqetësim në kofshën e majtë; rezonanca magnetike ka përjashtuar dëmtim muskulor. Futbollisti ka nisur një program fizioterapi në Klinikën e Kombëtares dhe po monitorohet nga stafi mjekësor.
Pjesa tjetër e ekipit fillimisht u ushtrua në palestër, pastaj e zhvendos punën në fushë, ku fokusi kryesor ishte aspekti taktik. Lojtarët zhvilluan skema të ndryshme dhe punuan mbi detyra dhe situata specifike të lojës, duke përfshirë edhe ushtrime për goditje standarde.
Kuqezinjtë do të vazhdojnë programin stërvitor në "Shtëpinë e Futbollit" edhe nesër, ndërsa të premten do të zhvillojnë stërvitjen zyrtare para ndeshjes me Bjellorusinë në stadiumin "Air Albania".