Në Nikushtak mbyllja e deponisë sjell rrezikun e një hapësire të re

Hapësira e deponisë në fshatin Nikushtak të Komunës së Likovës është rrethuar dhe mbyllur zyrtarisht, por kjo masë nuk ka arritur ta ndalojë hedhjen e pakontrolluar të mbetjeve. Sipas të dhënave të publikuara, pas vendosjes së rrethimit, banorët kanë nisur t'i lënë mbeturinat dhe mbetjet inerte pikërisht përballë ish-deponisë, duke ngritur frikën e formimit të një pike të re grumbullimi.

Kjo situatë dëshmon përkeqësimin e gjendjes mjedisore për shkak të mungesës së një zgjidhjeje alternative për zonën. Lidhur me vendndodhjen se ku po dërgohen mbetjet aktuale, Komuna e Likovës nuk ka dhënë detaje konkrete, por ka përmendur se bashkë me komunat e tjera të rajonit verilindor kanë themeluar një ndërmarrje ndërkomunale për ndërtimin e një deponie rajonale në territorin e Sveti Nikollës, projekt i mbështetur nga Bashkimi Evropian përmes Ministrisë së Mjedisit.