Ndërron jetë i riu i lënduar rëndë nga rrëzimi i kranit në Prishtinë
Mjekët e QKUK-së luftuan rreth dy orë pa sukses për jetën e tij, ndërsa i lënduari tjetër mbetet i stabilizuar në Klinikën e Torakales, thotë Naser Syla.
PRISHTINË — Njëri nga personat e lënduar rëndë nga rrëzimi i kranit në Prishtinë ka ndërruar jetë, pavarësisht përpjekjeve të stafit të Qendrës Klinike Universitare të Kosovës (QKUK). Vdekjen e konfirmoi për IndeksOnline Naser Syla nga Emergjenca e QKUK-së, i cili bëri të ditur se në klinikë ishin pranuar dy të rinj me politrauma të rënda si pasojë e aksidentit.
Sipas Sylës, njëri prej të lënduarve ka ndërruar jetë pas rreth dy orësh përpjekjesh të pandërprera nga mjekët për t'ia shpëtuar jetën. Ndërkohë, personi tjetër i lënduar në të njëjtin aksident vazhdon të jetë nën trajtim në Klinikën e Torakales të QKUK-së.
"I lënduari tjetër ka pësuar lëndime të rënda, por gjendja e tij shëndetësore është stabile", tha Syla për IndeksOnline.
Burim: IndeksOnline
— Redaksia ZHURMA