Mungesa e stilolapsave me adrenalinë në tregun vendas shqetëson qytetarët

Stilolapsat me adrenalinë, të cilët shërbejnë për të shpëtuar jetë në rastet e reaksioneve të rënda alergjike të njohura si anafilaksi, nuk gjenden në tregun e Maqedonisë së Veriut dhe qytetarët detyrohen t'i blejnë jashtë vendit, kryesisht në Greqi, ku sfidë mbeten çmimi i lartë dhe afati i kufizuar i përdorimit. Reaksionet e tilla mund të shfaqen papritur nga ushqimet, barnat apo pickimet e insekteve, ndërsa administrimi i shpejtë i adrenalinës është vendimtar.

Doktoresha Tatjana Jaçovska nga Klinika për Sëmundje të Mushkërive „Kozle“ thotë se personat e rrezikuar duhet të mbajnë gjithmonë me vete një auto-injektor për ndërhyrje të shpejtë ndaj simptomave si vështirësitë në frymëmarrje dhe ënjtjet. Nga ana e saj, doktoresha Mirjana Popovska thekson se ekspozimi i përsëritur ndaj alergjenëve mund të shkaktojë reaksione serioze dhe se personeli i trajnuar mund të parandalojë pasoja tragjike.

Për shkak të rrezikut të shokut anafilaktik te fëmijët në çerdhe dhe shkolla, personeli mjekësor kërkon trajnime të detyrueshme për edukatorët dhe mësuesit. Mjekët bëjnë thirrje për sigurimin e qasjes më të madhe në këto pajisje në vend dhe rritjen e gatishmërisë institucionale arsimore.