Muja: Kosova vendos kontroll 100 për qind për mishin nga Brazili

Ministri i Bujqësisë, Armend Muja, ka bërë të ditur në Kuvendin e Kosovës se është vendosur kontroll 100 për qind për secilën dërgesë të mishit nga Brazili. Ky vendim erdhi pas dyshimeve për parregullsi me etiketat e afatit të përdorimit të produkteve të destinuara për tregun kosovar dhe ndalimit të 103 tonëve mish viçi të ngrirë në Portin e Tivarit.

Sfondi i këtij veprimi lidhet me masat e ndërmarra pasi autoritetet e Malit të Zi kapën katër kontejnerë me mish me afat të skaduar që po tentoheshin të importoheshin nga kompania Apetit SHPK. Bllokimet në Portin e Tivarit u realizuan në dy raste, përkatësisht më 15 shtator dhe 23 shtator. Dogana e Malit të Zi bëri të ditur se nga kjo kompani ishin angazhuar persona me pajisje për të falsifikuar etiketat e datave të skadimit.

Sipas ministrit Armend Muja, Autoriteti i Ushqimit i Kosovës ka kontaktuar autoritetet malazeze më 16 shtator, ndërsa informacionet e para që konfirmonin dyshimet për ndërrimin e etiketave janë pranuar më 29 shtator. Ministria ka urdhëruar verifikimin e çdo dërgese të importuar nga 1 janari deri më 5 shtator, duke vënë nën kontroll gjithsej 1,446 dërgesa nga Brazili. Po ashtu, Muja njoftoi se nga 240 analiza laboratorike të dërguara, janë pranuar rezultatet për 111 prej tyre, ku 5 mostra kanë dalë me parametra shqetësues dhe janë dërguar për verifikim jashtë vendit. Dy nga këto mostra u përkasin produkteve të kompanisë Apetit, ndërsa tri të tjerat operatorëve të tjerë, meqë 60 për qind e importeve realizohen nga kompani të tjera.

Gjatë seancës për pyetje parlamentare, deputetja e Aleancës, Time Kadrijaj, ngriti shqetësime për sigurinë ushqimore dhe kërkoi sqarime mbi përgjegjësinë institucionale dhe rrezikun ndaj popullatës. Kadrijaj pyeti ministrin nëse kompania Apetit do të futet në listën e zezë dhe akuzoi se po blihet mish me afat të skaduar.

Në fjalën e tij, ministri Muja sqaroi arsyet e veprimeve të ndërmarra nga institucionet. «Kemi vendosur 100% kontroll të dërgesave të mishit nga Brazili në saje të lajmërimit të Bashkimit Evropian që Brazili do të hiqet nga lista e establishmentëve të aprovuara. Më 29 shtator, ne kemi pranuar informacionet e para të cilat konfirmojnë dyshimet që i kanë autoritetet se në këto disa dërgesa ka pasur ose ka dyshime për ndërrim të etiketave. Deri më tani, këtë informacion e kemi nga autoritetet e Malit të Zi. Megjithatë, unë dëshiroj t’ju informoj që paralelisht dhe pa marrë parasysh veprimet e Malit të Zi e raportin zyrtar për të cilin po e presim zyrtarisht, që nga shtatori kemi urdhëruar 100% kontroll të çdo dërgese», deklaroi Muja.

Nga ana e saj, deputetja Kadrijaj u shpreh ashpër gjatë diskutimit në Kuvend. «Nuk duhet që të helmohet popullata. A do ta fusnin në listën e zezë kompaninë Apetit? Po bleni mish me afat të skaduar që të helmoni popullatën», theksoi Kadrijaj.