Komisioni për Shëndetësi miraton ndryshimet buxhetore për vitin 2026

Komisioni për Shëndetësi ka miratuar Projektligjin për ndryshimin dhe plotësimin e Ligjit mbi ndarjet buxhetore për Buxhetin e Republikës së Kosovës për vitin 2026. Ky dokument kaloi me gjashtë vota pro, tri abstenime dhe asnjë votë kundër në mbledhjen e mbajtur.

Sylejman Meholli, anëtar i komisionit nga radhët e Lëvizjes Vetëvendosje, theksoi se kjo ndarje buxhetore lidhet me pagën e 13-të. Sipas tij, bëhet fjalë për një plotësim-ndryshim që prek sektorin e shëndetësisë dhe sektorët e tjerë, përmes 102 milionë eurove shtesë në kodin 28900 për pagën e 13-të në sektorin publik. Meholli shtoi se këto mjete do të angazhojnë profesionistë shëndetësorë dhe do të mundësojnë pagesën e shtesës për përvojën e punës prej 0.5% në vit sipas vendimit të Gjykatës Kushtetuese, e cila do të shlyhet në mënyrë retroaktive për periudhën e papaguar.

Gjatë diskutimeve, Blerta Deliu-Kodra, anëtare e komisionit nga PDK-ja, kërkoi praninë e ministrit të Shëndetësisë, Arben Vitia, në raportim për të adresuar kërkesat lidhur me ligjin e sigurimeve shëndetësore dhe çështje të tjera. Ndërkaq, Naim Bardiqi nga LVV-ja u shpreh se Ministria e Shëndetësisë është pjesë e këtij plotësim-ndryshimi ligjor, duke përfshirë sigurimin e detyrueshëm shëndetësor, furnizimin me produkte, shërbimet farmaceutike, kujdesin parësor dhe projeksionet e investimeve për vitet në vijim.