Festivali “Mokra n'Fest” mbahet më 8 gusht në Golik
Albana Koçiu fton qytetarët të bashkohen; në program kanoe në Shkumbin, kamping e koloni piktorësh.
ELBASAN — Edicioni i shtatë i festivalit “Mokra n'Fest” mbahet më 8 gusht pranë Urës së Gurit në Golik, në zemër të Mokrës. Festivali synon të promovojë traditat, folklorin, gastronominë dhe bukuritë natyrore të kësaj treve dhe ndër vite është shndërruar në një pikëtakim për banorët e Mokrës, vizitorët e të gjithë ata që duan të njihen me kulturën e zonës.
Zëvendëskryeministrja e Shqipërisë, Albana Koçiu, e cilësoi festivalin një mundësi për të promovuar vlerat kulturore e traditat shqiptare dhe ftoi qytetarët t'i bashkohen festës së 8 gushtit. Pjesëmarrësit do të provojnë gatime tradicionale të Mokrës, të përgatitura nga banoret e zonës.
Programi përfshin lundrim me kanoe në lumin Shkumbin, kamping, koloni piktorësh, ekspozitë fotografike dhe programe për fëmijë e të rinj. Festa ndërthur kulturën, turizmin dhe rekreacionin.
Burim: KultPlus
— Redaksia ZHURMA
