Platforma "Liria ka Emër" i drejtohet Parlamentit Evropian për Specialen

Platforma qytetare "Liria ka Emër" i ka dërguar një letër zyrtare anëtarëve të Parlamentit Evropian, Komisionit për Punë të Jashtme, Nënkomisionit për të Drejtat e Njeriut, Komisionit Evropian dhe Shërbimit Evropian të Veprimit të Jashtëm në Bruksel, ku ka kërkuar shqyrtimin e shqetësimeve serioze që kanë shoqëruar funksionimin e Dhomave të Specializuara të Kosovës në Hagë. Siç raportoi Zhurma më 11 tetor 2026, mërgata dhe qytetarët ishin tubuar më parë për të kërkuar drejtësi për ish-krerët e UÇK-së para Parlamentit Evropian.

Në kërkesat e paraqitura, platforma ka kërkuar organizimin e një dëgjimi parlamentar të posaçëm dhe një vlerësim të pavarur ndërkombëtar, duke iu referuar edhe raportit të Bar Human Rights Committee of England and Wales të përgatitur në prill të vitit 2026 me kërkesë të Avokatit të Popullit të Kosovës. Po ashtu, është kërkuar që Komisioni Evropian dhe EEAS të përgatisin një raport të posaçëm për transparencën dhe respektimin e të drejtave të njeriut, si dhe shqyrtimin e mekanizmave të financimit dhe mbikëqyrjes.

Në dokument janë ngritur shqetësime lidhur me paraburgimin e tejzgjatur, barazinë e armëve ndërmjet Prokurorisë dhe Mbrojtjes, besueshmërinë e provave, paanshmërinë gjyqësore dhe kontrollin e origjinës së materialeve të siguruara nga institucionet e Serbisë. Gjithashtu është kërkuar sqarim për mospërputhjen mes raportit të Dick Marty-t të vitit 2011 dhe aktakuzës ndaj ish-udhëheqësve të UÇK-së, ku sipas tyre trafikimi i organeve nuk figuron.

«Ne nuk po kërkojmë imunitet për askënd, por garanci që askush të mos gjykohet jashtë standardeve universale të drejtësisë», thuhet ndër të tjera në letrën ku kërkohet gjithashtu një takim me përfaqësuesit e platformës.